रुपन्देही उद्योग संघको ४८औँ साधारण सभा : उद्योगमैत्री नीति र समस्या समाधान गर्न उद्योगीको माग

बुटवल । रुपन्देही उद्योग संघको ४८औँ साधारण सभामा उद्योगीहरूले सरकार उद्योगमैत्री बन्नुपर्ने माग गरेका छन्।
उद्योग सञ्चालनमा देखिएका समस्या समाधान गर्न, लगानीको वातावरण बनाउन र स्वदेशी उत्पादनलाई प्रोत्साहन गर्न सरकार गम्भीर बन्नुपर्ने उनीहरूको जोड छ।
उद्योगीहरूले नीतिगत अन्योल, उत्पादन लागत, औद्योगिक पूर्वाधार तथा उद्योग सञ्चालनमा देखिने व्यावहारिक कठिनाइलाई सम्बोधन गर्न सरकारको ध्यानाकर्षण गराएका छन्।
उद्योग क्षेत्रका समस्या लामो समयसम्म समाधान नहुँदा लगानीकर्ता निरुत्साहित हुने र औद्योगिक विकास प्रभावित हुने उनीहरूको भनाइ छ।

उद्योगीहरूले तीनै तहका सरकारसँग उद्योग क्षेत्रका समस्या समाधानका लागि प्रभावकारी पहल गर्न आग्रह गरेका छन्।

एजाज आलमको प्रश्न : ‘कहिलेसम्म अलपत्र पार्ने हो?’

साधारणसभामा लुम्बिनी प्रदेश उद्योग परिसंघका अध्यक्ष एजाज आलमले उद्योग क्षेत्रका समस्या लामो समयसम्म अलपत्र पारेर राख्न नहुने बताएका छन्।
उनले औद्योगिक क्षेत्रसँग सम्बन्धित समस्या समाधानमा भइरहेको ढिलाइप्रति प्रश्न उठाउँदै भने, “कहिलेसम्म अलपत्र पार्ने हो?”
अध्यक्ष आलमले उद्योग क्षेत्रको विकास र विस्तारका लागि देखिएका समस्या समयमै समाधान गर्नुपर्नेमा जोड दिएका छन्। उद्योगी व्यवसायीले अपेक्षा गरेअनुसार औद्योगिक विकासका काम अघि बढ्न नसक्दा उद्योग क्षेत्र प्रभावित हुने भएकाले सम्बन्धित निकायले यस विषयमा गम्भीर भएर काम गर्नुपर्ने उनको भनाइ रहेको छ।

तुलसी चौधरीको भनाइ : उद्योगको विकासबिना देशको विकास सम्भव छैन
लुम्बिनी प्रदेशका उद्योगमन्त्री तुलसीप्रसाद चौधरीले उद्योगको विकासबिना देशको विकास सम्भव नहुने बताएका छन्।
उद्योगबाट प्रदूषण हुने भए पनि उद्योगीका समस्या समाधान गर्नु राज्यको दायित्व भएको उनको भनाइ छ।
उनले विगतमा उद्योग स्थापना गर्दा आसपासमा बस्ती नरहेको तर पछि उद्योगकै छेउछाउमा मानिसहरू बसोबास गर्न थालेको, व्यवसाय विस्तार भएको र घरहरू निर्माण भएको उल्लेख गरे। पछि त्यही उद्योगले प्रदूषण गरेको भन्दै विरोध हुने गरेको उनको भनाइ थियो।
चौधरीले भने, ‘विगतमा उद्योग स्थापना गर्दा त्यस क्षेत्रमा कुनै घर थिएनन्। पछि उद्योगको छेउछाउमा मानिसहरू आउन थाले, व्यवसाय हुन थाल्यो र घरहरू बन्न थाले। तर पछि उद्योगले प्रदूषण गर्छ भन्न थालियो।’
उनले नेपाली समाजमा कसैले नयाँ काम सुरु गरेपछि अरूले पनि त्यसैको सिको गर्ने प्रवृत्ति रहेको उल्लेख गर्दै उद्योग सञ्चालन र विस्तारका क्रममा देखिने समस्यालाई समग्रतामा बुझ्नुपर्ने धारणा राखे।

अदालतमा मुद्दा विचाराधीन हुँदा उद्योग सञ्चालन प्रभावित भएको सांसद खरेलको भनाइ

कार्यक्रममा बाेल्दै प्रतिनिधिसभा सदस्य सुलभ खरेलले लुम्बिनी क्षेत्रका उद्योगसँग सम्बन्धित अदालतमा विचाराधीन मुद्दा र त्यसले औद्योगिक गतिविधिमा पारेको प्रभावबारे धारणा राखेका छन्।
उद्योगी–व्यवसायीका समस्या, औद्योगिक विकासका चुनौती र उद्योग सञ्चालनका क्रममा देखिएका कानुनी जटिलताबारे छलफल भइरहेका बेला सांसद खरेलको अभिव्यक्ति आएको हो।
रुपन्देही क्षेत्र नम्बर २ का सांसद खरेल उद्योगी–व्यवसायीका समस्या समाधान गर्न नीतिगत स्पष्टता, औद्योगिक पूर्वाधार विकास र निजी क्षेत्रसँग सहकार्य आवश्यक रहेको धारणा राखेका थिए। उनले कानुनी जटिलता हटाउँदै उद्योगमैत्री वातावरण निर्माण गर्नुपर्नेमा जोड दिएका थिए।
प्रतिनिधिसभा सदस्य खरेलले सरकारले पछिल्लो ६ महिनामा अपेक्षा गरेअनुसार काम गर्न नसकेको स्वीकार गरेका छन्।
उनलेे सरकारले ६ महिनाको अवधिमा सोचेअनुसार काम गर्न नसकेको आफूले पनि स्वीकार गर्ने बताए ।
सरकारको कामकारबाहीबारे आफ्नो धारणा राख्दै उनले अपेक्षा र उपलब्धिबीचको अन्तरलाई स्वीकार गरेका हुन्। सरकारप्रति नागरिक तथा निजी क्षेत्रका अपेक्षा उच्च रहेका बेला सांसद खरेलको यो अभिव्यक्ति आएको हो।
उद्योगी–व्यवसायीका समस्या र औद्योगिक क्षेत्रका चुनौतीबारे छलफल हुने साधारणसभामा सरकारको कार्यसम्पादनको विषयसमेत उठेको छ। उद्योग क्षेत्रको विकासका लागि सरकारले नीतिगत स्पष्टता, लगानीमैत्री वातावरण र उद्योग सञ्चालनमा देखिएका समस्या समाधानमा प्रभावकारी भूमिका खेल्नुपर्ने उद्योगीहरूको अपेक्षा रहँदै आएको छ।

बधशाला जीर्ण भयो, मुद्दा पर्दा काम गर्न सकिएन : उपप्रमुख सावित्रा अर्याल
बुटवल उपमहानगरपालिकाकी उपप्रमुख सावित्रा अर्यालले बुटवलको बधशाला जीर्ण बनेको र मुद्दा परेपछि त्यससम्बन्धी काम अघि बढाउन नसकिएको बताएकी छन्।
बुटवलमा व्यवस्थित बधशाला सञ्चालन गरी स्वच्छ तथा गुणस्तरीय मासु आपूर्ति सुनिश्चित गर्ने विषय लामो समयदेखि चर्चामा रहँदै आएको छ। तर, बधशालाको जीर्ण संरचना र कानुनी प्रक्रियाका कारण काम अघि बढाउन कठिनाइ भएको अर्यालको भनाइ छ।
उद्योग संघको साधारणसभामा उद्योगी व्यवसायीले औद्योगिक क्षेत्रका समस्या, पूर्वाधार विकास र उद्योगमैत्री वातावरण निर्माणका विषय उठाइरहेका बेला उपप्रमुख अर्यालको भनाइले बुटवलको बधशाला व्यवस्थापनको विषयलाई पनि चर्चामा ल्याएको छ।

अप्ठ्यारोमा परेका यात्रुलाई दसैँमा निःशुल्क घर पुर्‍याइदिन्छौँ : दधिराम खरेल
पश्चिम नेपाल बस व्यवसायी प्रालिका अध्यक्ष दधिराम खरेलले दसैँका बेला यात्रुहरू अप्ठ्यारोमा परेमा निःशुल्क घरसम्म पुर्‍याउने बताएका छन्।
दसैँमा घर फर्किने यात्रुको चाप बढ्ने र कतिपय यात्रुले यात्राका क्रममा समस्या भोग्नुपर्ने अवस्थालाई ध्यानमा राख्दै अध्यक्ष खरेलले उद्योग संघकाे साधारणसभामा यस्तो बताएका हुन्।
उनले चाडपर्वका बेला यात्रुलाई सहज, सुरक्षित र भरपर्दो यातायात सेवा उपलब्ध गराउनु व्यवसायीको दायित्व भएको उल्लेख गर्दै अप्ठ्यारोमा परेका यात्रुलाई सहयोग गर्ने प्रतिबद्धता जनाएका छन्।
दसैँका बेला रोजगारी, अध्ययन तथा विभिन्न कामका सिलसिलामा देशका विभिन्न स्थानमा रहेका मानिसहरू घर फर्किने गर्छन्। यस समयमा सार्वजनिक यातायातमा यात्रुको चाप बढ्ने, टिकट पाउन कठिन हुने र गन्तव्यसम्म पुग्न समस्या हुने गरेको छ।
यस्तो अवस्थामा यात्रुलाई सहयोग गर्ने पश्चिम नेपाल बस व्यवसायी प्रालिको प्रतिबद्धताले चाडपर्वका बेला घर फर्किने यात्रुलाई राहत पुग्ने अपेक्षा गरिएको छ।
उद्योग संघका अध्यक्ष कृष्ण पराजुलीकाे अध्यक्षतामा साधारणसभा सम्पन्न भएको थियो ।