सुर्खेत । राष्ट्रिय स्वतन्त्र पार्टीका सभापति रवि लामिछानेले लोकतन्त्रलाई खतरा हुने व्यक्ति हेलिकोप्टर चढेर भागिसकेको बताउँदै त्यो हेलिकोप्टर फेरि बालुवाटार र सिंहदरवारमा आउन नहुने बताएका छन् ।
सुर्खेतमा आयोजित चुनावी सभालाई बिहीबार सम्बोधन गर्दै उनले लोकतन्त्र जोगाउन कुनै नेता वा पार्टीले ठेक्का लिन नपर्ने बताए ।

’लोकतन्त्रलाई जसबाट खतरा थियो, ऊ हेलिकोप्टर चढेर भागेको छ । लोकतन्त्रलाई खतरा तब हुन्छ, जब त्यो हेलिकोप्टर सिंहदरवार र वालुवाटारमा फर्किन्छ,’ उनले भने, ’भागेको त्यो हेलिकोप्टर जहाँ ल्याण्ड हुन्छ ल्याण्ड होस्, हामीलाई भन्नु केही छैन् तर जनताको भाग्य र भविश्य फेर्ने सिंहदरवारमा ल्याण्ड नहोस्, यति भए पुग्छ ।’

उनले फरिवर्तनको झिल्कोलाई कसैले पनि चुनौति दिन नहुने बताए । उनले अहिले चुनाव सार्नुपर्छ, चुनावले निकास दिँदैन भन्ने सुनिएको बताउँदै चुनावले निकास नदिने भए केले निकास दिन्छ ? भन्दै प्रश्न गरे । उनले आफू मतबाट नभएर रोडबाट पनि भिड्न तयार रहेको बताए ।