अजरन्यूज संवाददाता
बुटवल । नेपालमा रहेका चार बामपन्थी कम्युनिष्ट दलहरुले निर्वाचन बहिष्कार र आन्दोलन एकसाथ गर्ने घोषणा गरेका छन ।
चार वटा पार्टी सम्मिलित केन्द्रीय संयुक्त संघर्ष समितिले बिहिवार निर्वाचन बहिष्कार र आन्दोलनको घोषणा गरेको हो ।

क्रान्तिकारी कम्युनिस्ट पार्टी नेपाल, नेपाल कम्युनिस्ट पार्टी (बहुमत), वैज्ञानिक समाजवादी कम्युनिस्ट पार्टी नेपाल र नेपाल कम्युनिस्ट पार्टी सम्बद्ध केन्द्रीय संयुक्त सङ्घर्ष समितिको बैठकले आन्दोलनका कार्यक्रम तय गरेको आज बिहिवार जारी बिज्ञप्तीमा उल्लेख छ । विज्ञप्तीमा नेताहरु कट्टेल र बास्तोलालाई रिहा गर्न माग गर्दै आन्दोलनका कार्यक्रम घोषणा गरिएको छ ।

जसअन्तरगत फागुन ८ देखि १२ गतेसम्म आगामी संसदीय निर्वाचन बहिष्कारको पक्षमा गाउँ, टोल र वडासम्म पर्चा वितरण, घरदैलो र कोणसभाहरू गर्ने र फागुन १३ देखि १८ गतेका बिचमा स्थानीय अनुकूलता हेरेर इटहरी, जनकपुर, चितवन, काठमाडौँ, बुटवल, दाङ्, बर्दिया, धनगढी लगायतका सहरहरूमा बहिष्कार सभाहरू आयोजना गर्ने निर्णय गरिएको विज्ञप्तीमा उल्लेख छ ।