दाङ । प्रहरीले दाङका एक किशोरकाे हत्यामा संलग्नता रहेकाे अभियाेगमा गए रातभरकाे अनुुसन्धानपछि तीन जनालाई पक्राउ गरेकाे छ ।
घटना भएकाे २४ घण्टा नबित्दै इलाका प्रहरी कार्यालय भालुवाङका कार्यालय प्रमुख प्रहरी निरिक्षक पुष्करसिंह ऐरी नेतृत्वकाे प्रहरी टाेलीले रातभर लगाएर ती ३ जना अभियुक्तलाई प्रकाउ गरेकाे हाे ।

हत्यामा संलग्न भएकाे आराेपमा प्रहरीले दाङकाे बंगलाचुली निवासी बर्ष २० का संदिप वली, राप्ती गाउँपालिकाका बर्ष १८ का निश्चल चाैधरी र राप्ती गाउँपालिकाकै वर्ष १८ की आकृति बुढालाई पक्राउ गरिएकाे जिल्ला प्रहरी कार्यालय दाङका निमित्त प्रबक्ता तथा प्रहरी निरीक्षक बाबुराम बस्नेतले जानकारी दिए ।

प्रहरीले घटना भएकाे थाहा पाए लगत्तै शुक्रबार रातभर नै घटनास्थल सहितका ठाउँमा अनुसन्धान गरी आज शनिबार बिहान ४ बजे मात्र अभियुक्तलाई पक्राउ गरेको हाे ।अभियुक्त तीन जनालाई प्रमाण सहित फेला पारिएको प्रहरीले जनाएकाे छ ।

बिहिबार राती राप्ती गाउँपालिका–२ बराखुट्टी निवासी १६ बर्षिय स्मित प्रधानलाई हत्या गरी वडा नं. ४ गोपीनालाकाे दाेलाईखाेला नजिक नालामा फालेको अवस्थामा शब फेला परेको थियाे । मृतक प्रधानको शरिरमा धारिलाे हतियार प्रयाेग गरि हत्या गरेकाे देखिएपनि पाेष्टमार्टम रिपोर्ट आउन बाँकी छ । यस्तै एक किशाेर घाईते अवस्थामा भेटिएका थिए । उनकाे उपचार जारी छ ।