पाेखरा ( कास्की ) । पोखरा महानगरपालिका–८ सभागृह चोक नजिकै धारिलो हतियार प्रहार गरी ४२ वर्षीया सिर्जना पौडेल केसीको हत्या अभियाेगमा प्रहरीले दुई जनालाई पक्राउ गरेको छ।
हत्या गरेर फरार भएकामध्ये मुख्य व्यक्तिलाई बुटवलबाट पक्राउ गरिएकाे प्रहरीले जनाएको  छ।

कास्की प्रहरी प्रमुख एसपी नवीन कार्कीका अनुसार पृथ्वीचोकमा पसल सञ्चालन गर्दै आएकी केसीको गत बुधबार बेलुकी खुँडा प्रहार गरी हत्या गरिएको थियो।

प्रहरीले हत्यामा संलग्न भएको अभियाेगमा पर्वतको कुश्मा नगरपालिका–११ शिल्मी घर भइ पोखरा–६ मा डेरा गरी बस्ने सन्तोष भन्ने वर्ष २७ का शिशिर केसी र पोखरा–१७, रातोपाहिरा बस्ने वर्ष ३२ का कुशल परियारलाई पक्राउ गरेकाे हाे ।

प्रहरीले केसीलाई रुपन्देहीको बुटवल उपमहानगरपालिका–२ मनकामना टोलबाट पक्राउ गरिएकाे जनाएको छ । केसी यसअघि पनि विभिन्न आपराधिक गतिविधिमा संलग्न भएका थिए।

गत बुधबार साँझ पोखरा–बागलुङ सडक अन्तर्गत शिवालय चोक नजिकै सिर्जनालाई अपरिचित व्यक्तिले धारिलो हतियार प्रहार गरी गम्भीर घाइते बनाएका थिए। मृतक सिर्जना पोखरा महानगरपालिका–५ जिरो किलोमिटर घर भइ हाल पोखरा–१८, सेदी बस्दै आएकी थिइन्।

एसपी कार्कीका अनुसार प्रहरीले हत्याका बखत प्रयोग गरिएको ग २५ प ३०४४ नम्बरको स्कुटर पनि फेला पारेको छ। त्यस्तै हत्यामा प्रयोग गरिएको खुँडालाई पोखरा १६ बिरौटास्थित तितेपानी जंगलबाट फेला पारेको छ।

स्कुटर चालक परियारलाइ काममा सघाएबापत पैसा दिने भन्दै केसीले लिएर आएकाे प्रहरीको भनाइ छ ।