बुटवल । बुटवल उद्योग वाणिज्य संघको २६औँ अधिवेशनसँगै नेतृत्वका लागि चुनावी भिडन्त रोचक बनेको छ।

संघको अध्यक्ष पदमा नरिश्वर शर्मा पौडेल र टंकप्रसाद गैरे नेतृत्वका दुई प्यानल मैदानमा उत्रिएपछि बुटवलको उद्योग–व्यवसाय क्षेत्रमा चुनावी सरगर्मी बढेको हो।

पौडेल नेतृत्वको प्यानलले ‘नयाँ सोच, नयाँ विचार, समावेशी साझा नेतृत्व’ भन्ने नारासहित २० बुँदे प्रतिबद्धता सार्वजनिक गरेको छ। व्यवसायीको सुरक्षा, संघको संस्थागत सुदृढीकरण, बजार व्यवस्थापन, उद्योग संरक्षण, डिजिटल व्यापार प्रवर्द्धन तथा बुटवलको आर्थिक गतिविधि चलायमान बनाउने विषयलाई उसले प्राथमिकतामा राखेको छ।

पौडेल बुटवल उपमहानगरपालिका–४ का वडाध्यक्षसमेत हुन्। उनी यसअघि बुटवल उद्योग वाणिज्य संघको वाणिज्य उपाध्यक्षको भूमिकामा पनि रहेका थिए। स्थानीय तहको अनुभव र संघमा गरेको पूर्वभूमिकालाई आधार बनाएर पौडेल व्यवसायीका मुद्दा लिएर चुनावी मैदानमा उत्रिएका छन्।

उता, टंकप्रसाद गैरे नेतृत्वको प्यानलले ‘परिणाममुखी संयुक्त नेतृत्व, समृद्ध बुटवलको साझा प्रतिबद्धता’ नारासहित उम्मेदवारी घोषणा गरेको छ। व्यवसायीको हित र संरक्षण, व्यवसायमैत्री वातावरण, लगानी तथा उद्योगको सुरक्षा, पूर्वाधार विकास, बजार विस्तार तथा युवा र महिला उद्यमशीलतालाई प्राथमिकतामा राख्ने प्रतिबद्धता गैरे पक्षले जनाएको छ।

गैरे संघका वर्तमान वरिष्ठ उपाध्यक्ष हुन्। यसअघि पनि संघको विभिन्न जिम्मेवारीमा रहेर काम गरेका उनको लामो संस्थागत अनुभवलाई चुनावी प्रतिस्पर्धामा महत्वपूर्ण पक्षका रूपमा हेरिएको छ। केही समयअघि नै अध्यक्ष पदका आकांक्षीका रूपमा गैरेले आफ्नो दाबी प्रस्तुत गरेका थिए।

दुई प्यानल, दुई शैली

पौडेल पक्षले नयाँ सोच, संस्थागत सुधार र व्यवसायीका तत्कालीन समस्याको समाधानलाई जोड दिएको छ भने गैरे पक्षले संस्थागत अनुभव, संयुक्त नेतृत्व र प्रतिबद्धताको कार्यान्वयनलाई आफ्नो मुख्य आधार बनाएको देखिन्छ।

दुवै प्यानलले व्यवसायीका समस्या, बजारको सुस्ती, पूर्वाधार, पार्किङ तथा ट्राफिक व्यवस्थापन, लगानीको वातावरण र निजी क्षेत्रको संरक्षणजस्ता विषयलाई प्राथमिकतामा राखेका छन्।

अबको प्रतिस्पर्धामा व्यक्तिगत लोकप्रियतासँगै प्यानल व्यवस्थापन, व्यवसायीहरूसँगको सम्बन्ध, विगतको संस्थागत भूमिका र प्रतिबद्धताप्रतिको विश्वास महत्वपूर्ण हुने देखिन्छ।

कसले मार्ला बाजी?

नरिश्वर शर्मा पौडेल र टंकप्रसाद गैरे दुवैको पक्षमा आफ्नै अनुभव, टिम र एजेन्डा छन्। त्यसैले अहिले नै कसले जित्छ भन्ने निष्कर्ष निकाल्नुभन्दा मतदाताकाे अन्तिम रोजाइ र मतदानको परिणामले नै तस्वीर स्पष्ट पार्नेछ ।

यद्यपि दुई प्यानल आमनेसामने भएपछि बुटवल उद्योग वाणिज्य संघको यो अधिवेशन विगतका अधिवेशनभन्दा बढी चासोको विषय बनेको छ।
निर्वाचनमा अध्यक्ष पदका दुई प्रमुख प्रतिस्पर्धीबीचको मतान्तर कति हुन्छ भन्ने विषयसमेत अहिले व्यवसायीमाझ चर्चाको विषय बनेको छ। विशेषगरी दुवै समूहमा रहेका प्रभावशाली व्यवसायी, पूर्वपदाधिकारी तथा मतदाताको व्यक्तिगत सम्बन्धले अन्तिम परिणाममा महत्वपूर्ण भूमिका खेल्न सक्ने देखिन्छ।
यसपटकको निर्वाचनमा ‘नरीश्वर कि टंकप्रसाद?’ भन्ने प्रश्नले बुटवलको व्यावसायिक क्षेत्रमा चर्चा पाएको छ। प्रारम्भिक रूपमा दुवै पक्षबीच कडा प्रतिस्पर्धा हुने संकेत देखिए पनि अन्तिम समयमा बन्ने समीकरण र मतदाताको निर्णयले मात्रै विजेताको टुंगो लगाउनेछ।
त्यसैले अहिले नै कसले बाजी मार्छ भनेर निश्चित भन्न सकिने अवस्था छैन। तर निर्वाचन नजिकिँदै जाँदा दुवै पक्षले आफ्नो संगठन विस्तार र मतदाता भेटघाटलाई तीव्र बनाउने तयारी गरेका छन्।
अन्ततः बुटवल उद्योग वाणिज्य संघको नेतृत्व कसले सम्हाल्ने भन्ने निर्णय व्यवसायी मतदाताको हातमा हुनेछ।