सुनवल । सडक पार गर्ने क्रममा तीव्र गतिमा आएको हाइसको ठक्करबाट पश्चिम नवलपरासीको सुनवलमा एक महिलाको ज्यान गएको छ।
सुनवल नगरपालिका–४ लक्ष्मीपथकी ६८ वर्षीया दिलमाया दर्जीको दुर्घटनामा परी मृत्यु भएको हो।
प्राप्त विवरणअनुसार मंगलबार साँझ करिब ८ः४० बजे सडक पार गर्दै गरेकी दर्जीलाई पूर्वबाट पश्चिमतर्फ गइरहेको लु २ ख ५०९७ नम्बरको हाइसले ठक्कर दिएको थियो।

ठक्करबाट गम्भीर घाइते भएकी उनलाई तत्काल उपचारका लागि बुटवलस्थित लुम्बिनी प्रादेशिक अस्पताल पुर्‍याइएको थियो। तर, चिकित्सकको प्रयासका बाबजुद उपचारकै क्रममा उनको मृत्यु भयो।
साँझको समयमा भएको उक्त दुर्घटनाले स्थानीय क्षेत्रमा दुःखद अवस्था सिर्जना गरेको छ। दुर्घटनापछि प्रहरीले हाइस र त्यसका चालकलाई नियन्त्रणमा लिएको छ।
घटनाबारे थप अनुसन्धान भइरहेको इलाका प्रहरी कार्यालय सुनवलले जनाएको छ।